KQZ hap aplikimin për akreditimin e vëzhguesve dhe mediave për zgjedhjet lokale të 12 tetorit
Komisioni Qendror i Zgjedhjeve (KQZ) ka njoftuar se është në vijim periudha e aplikimit për akreditimin e vëzhguesve dhe përfaqësuesve të mediave që do të monitorojnë Zgjedhjet Lokale për Kryetarë të Komunave dhe për Kuvende Komunale, të planifikuara për t’u mbajtur më 12 tetor 2025.
Të drejtë aplikimi kanë subjektet politike të certifikuara, organizatat joqeveritare vendore dhe ndërkombëtare, organizatat qeveritare dhe ndërqeveritare, ato të specializuara në fushën e zgjedhjeve dhe të drejtave të njeriut, si dhe mediat dhe përfaqësuesit diplomatikë të vendeve të huaja.
Afatet e aplikimit sipas kategorive janë si më poshtë:
Subjektet politike të certifikuara: deri më 17 shtator 2025
OJQ-të, organizatat qeveritare, ndërqeveritare, ndërkombëtare dhe përfaqësuesit e vendeve të huaja: deri më 27 shtator 2025
Mediat vendore dhe ndërkombëtare: deri më 7 tetor 2025
Procedura e aplikimit:
Përfaqësuesi i autorizuar i organizatës apo institucionit duhet të plotësojë të dhënat përmes platformës online: https://apliko.kqz-ks.org
Pas shqyrtimit fillestar nga Zyra për Regjistrim, Certifikim dhe Kontroll Financiar të Subjekteve Politike (ZRCKFSP), aplikuesit do të pranojnë përmes e-mailit kredencialet për të plotësuar të dhënat e vëzhguesve apo përfaqësuesve për akreditim.
KQZ thekson se vetëm personat e akredituar përmes kësaj procedure do të lejohen të vëzhgojnë procesin zgjedhor dhe aktivitetet përcjellëse në të gjitha Qendrat Komunale të Numërimit (QKN) dhe në Qendrën e Numërimit dhe Rezultateve (QNR).
Për informacione shtesë, të interesuarit mund të kontaktojnë në adresën elektronike [email protected] apo në numrin e telefonit +383 38 200 81 010 (prej orës 08:00 deri në 16:00).
